我知足所以常樂

同阿嫲、老豆食飯，一邊食，一邊電視餸飯。咁啱就做緊旅遊節目，介紹緊日本既寺廟。

我：「去旅行最攰就係行路。好似去日本咁，搭地鐵轉車、上月台，出閘再行去景點。其實行好遠，到左廟門口仲要行好大段路，其實係體力既考驗。」
老豆：「係呀，係你地後生先頂得順。我上次去清水寺落左車都仲要行條大斜路上去，然後又要行樓梯，好攰架。」
我：「所以我咪選擇踩單車，行少d路。」
嫲嫲：「你去過京都喇！京都喺日本架wo。」
我：「終於都去過喇！」
嫲嫲：「就係一個人去果次？」
老豆（認叻咁）：「你個孫宜家好叻架，成日一個人周圍去旅行喇！」
我（又認叻咁）：「我仲係自己踩單車周圍去添！」
老豆：「你有GPS?」
我：「我去到有買單車地圖，而且京都既路好簡單，好多指示牌，好易認路。」

忽然醒起，其實我老豆好少讚我，可能我不嬲無乜專長，讀書又唔叻，搵錢又唔多，好難搵個位去讚我。我只能叫做自力更生，唔駛靠屋企。雖然對屋企無乜大貢獻，但叫做無學壞，無穿無爛果隻。

今日老豆忽然好自豪咁同阿嫲講左句「你個孫宜家好叻架」，令我有d開心，可能佢好自豪個囡好獨立啩😂！

大家成日問我「你一個人出門，屋企人唔擔心咩？」。

我想講既係「佢地從來無反對我」，只要我去旅行既錢唔係借同偷番黎，其實佢地都無問過我，或者講話「好危險唔好去」之類既話話。

其實我屋企人真係好開通，從來都唔會管我去邊，佢地反而覺得我要周圍去下，見識下。而我阿媽比我厲害好多倍，佢去過既地方多過我好多，佢可能勁過好多working holiday既人，因為佢響十幾年前就試過一個人去英國既小島打工一年。歐洲、美國、澳洲都比佢去過晒。重點係佢完全係窮遊，真係超級Amazing。所以我呢d去下東南亞既人，根本對佢黎講係小兒科😏😏。我讀緊小學，佢已經歐遊過N次。

間唔時就會有人話我，通常係好一般好一般既朋友，或者係d網上既口痕友，有次我寫左篇文章關於一個人旅行既體會，佢就留言話我點對得住自己屋企人，仲話我既任性將會令屋企人擔驚受怕。其實有時無啦啦比人話，真係好莫名其妙。唔講，仲以為佢係我屋企人，無啦啦教訓我！？

對住唔理解既人，一於少理，講句多謝關心，然後一笑置之啦。呢個世界上就係有好多「憎人富貴厭人貧」既人，既然做咩都有機會比人話。咁就梗係揀自己鐘意既野黎做啦，反正我從來都無諗住要做「劉華」，或者要去討好到全世界。

宜家身邊有人明白我，好朋友又支持我，連屋企人都讚我，其實我覺得自己真係已經好幸福喇！

人，最緊要咪就係知足，所以我咪常樂囉